Fonte dos Ranchos proclámase campión do XIII Maratón de Fútbol Sala de Outeiro de Rei
O pavillón de Outeiro de Rei converteuse esta fin de semana no epicentro do deporte e do lecer coa celebración do XIII Maratón de Fútbol Sala, unha cita xa consolidada no calendario estival do municipio e que reuniu a numerosos participantes e afeccionados.
Ademais da competición deportiva, o evento contou cun completo programa de actividades paralelas, entre as que destacaron un torneo de tute, un bingo popular e a cuarta edición da coñecida Caquiña da Vaquiña, contribuíndo a crear un ambiente festivo durante toda a fin de semana.
No apartado deportivo, o equipo Fonte dos Ranchos alzouse co título de campión tras unha destacada actuación ao longo do torneo. O subcampionato foi para Festas Teixeiro, mentres que Horta Outeiro acadou a terceira posición. O conxunto Santa Isabel Pool Bar completou os postos de honra coa cuarta praza.
Os premios individuais tamén tiveron protagonismo. Christian, de Fonte dos Ranchos, foi recoñecido como mellor porteiro do torneo. O galardón ao mellor xogador recaeu en Mael, tamén integrante do equipo campión, mentres que Ángel, de Festas Teixeiro, recibiu o premio ao segundo mellor xogador. Pola súa banda, Yeray, de Fonte dos Ranchos, rematou a competición como máximo goleador.
O recoñecemento ao mellor equipo do concello foi para Horta Outeiro, premiando así o seu papel destacado na competición.
No que respecta á IV edición da Caquiña da Vaquiña, o afortunado gañador foi Lucas.
Desde o Concello de Outeiro de Rei trasladaron os seus parabéns a todos os equipos e participantes, ao tempo que agradeceron a implicación de xogadores, colaboradores e público por continuar facendo deste maratón unha das citas máis especiais do verán no municipio. A xornada concluíu cun gran ambiente nas inmediacións do pavillón, onde os asistentes puideron seguir en directo a final do Mundial de fútbol animando á selección española.