Guitiriz acolleu unha delegación da campaña de control de velocidade da DGT
![campana-trafico-guitiriz](https://terrachaxa.com/wp-content/uploads/2024/07/campana-trafico-guitiriz.jpg)
A subdelegada do Goberno en Lugo, Isabel Rodríguez, supervisou hoxe acompañada do xefe provincial de Tráfico, Alberto Rodríguez, e membros do subsector da Garda Civil, a evolución da campaña de control de velocidade centrada en estradas convencionais e vías urbanas despregada ao longo desta semana, e que finalizará o domingo 21 de xullo. A iniciativa, que forma parte da programación anual da DGT, ten como obxectivo conseguir unha redución da velocidade media e concienciar sobre o risco da velocidade inadecuada nos accidentes de tráfico.
A subdelegada desprazouse ata Guitiriz e valorou sobre o terreo “este reforzo nos controis, para que a xente perciba a velocidade como un factor de risco, pois está presente nun 23 % dos accidentes mortais”, explicou. Segundo datos da Dirección Xeral de Tráfico, o 60 % dos condutores recoñece circular por enriba dos límites de velocidade en estradas convencionais, case o 50 % en zonas urbanas, e máis do 60 % recoñece que circula a máis velocidade que a permitida en autovías e autopistas.
A campaña de vixilancia e control pretende chamar a atención dos condutores sobre a incompatibilidade da alta velocidade coa condución, “tal e como xa está asumido no caso do uso do cinto ou o casco, ou o consumo de alcol”, afirmou a subdelegada. Tal e como indican desde a DGT, falta concienciación sobre a repercusión e as consecuencias da condución inadecuada, singularmente en caso de atropelo.
Isabel Rodríguez agradeceu o traballo dos axentes de tráfico nesta campaña, “reforzando os controis nos tramos máis perigosos e garantindo a seguridade viaria de todos os usuarios das estradas”. Determinou que “os excesos de velocidade teñen un impacto directo tanto no aumento do risco do sinistro durante a condución, como no aumento da severidade das lesións das persoas accidentadas”.
Campaña ASPAYM
Un grupo de persoas de ASPAYM Lugo tamén estivo presente neste lugar, presentando a campaña No corras, no bebas, no cambies de ruedas, que poñen en marcha en colaboración coa Dirección Xeral de Tráfico, Garda Civil e as Subdelegacións do Goberno. A iniciativa ten como elemento fundamental a participación activa de voluntarios, persoas con lesión medular vítimas dun accidente de tráfico, acompañando ocasionalmente aos axentes de tráfico encargados de realizar os controis.
O voluntario de ASPAYM achégase ao vehículo retido, trasladándolle a mensaxe común da campaña e demostrando ao mesmo tempo, coa súa presenza, as consecuencias e secuelas irreversibles dos actos imprudentes.