Insua prepárase para unha nova edición da Tasca do Liño o 29
![CARTEL TASCA 2022 portada](https://terrachaxa.com/wp-content/uploads/2022/10/CARTEL-TASCA-2022-portada.jpg)
A Tasca do Liño continúa a súa tradición este ano para celebrar a que será a súa edición número XIV o 29 de outubro, organizada, coma sempre, pola Asociación de Mulleres Rurais San Bartolomé de Insua.
Ese sábado, o programa abrirá co pregón da escritora Marica Campo, ás 11.15 horas, á que acompañarán Corredores de Sombras co poema musicado A Tasca, de Emilia Martínez, gañadora do II Certame de Poesía.
Ás doce haberá un recital poético a cargo de Anxo Angueira, escritor e director da Fundación Rosalía de Castro.
O prato forte do día, a demostración da Tasca terá lugar ás 12.45 horas, que rematará coa actuación da Charanga de Vilalba, antes do xantar, do que se ocupará o Food Truck AleAlé.
Ás 16.00 horas arrancarán as sesións de tarde con xogos tradicionais a cargo de Xotramu e a entrega de premios dos certames e poesía e debuxo.
Continuará a programación cunha degustación de Cacho e tras unha nova demostración da Tasca do Liño, ás 18.00 horas, terá lugar a actuación da escola de baile tradicional OxeitO con Verbena galega d'antes.
A festa rematará co conxuro da queimada a cargo de Manuel Ferreiro.
Como vén sendo tradicional, durante a xornada haberá postos artesáns e varias mostras de artesanía en vivo, ademais dunha mostra de bonecas e corozas do Centro de Artesanía e Deseño e outra fotográfica da asociación e do Iescha.
Como complemento haberá degustación de galo de Mos e de cervexa artesá AleAlé ademais dunha demostración de pandeiros de Xaneco.
![CARTEL TASCA lino insua](https://terrachaxa.com/wp-content/uploads/thumbs/2022/10/CARTEL-TASCA-lino-insua-200x382.jpg)