Jacobo Paz Limia gaña o LII Premio de Poesía do Certame Literario de Vilalba
O poeta Jacobo Paz Limia, residente na Coruña, é o gañador do LII Premio de Poesía do Certame Literario do Concello de Vilalba, segundo acordou este luns o xurado reunido na Casa da Cultura. A obra premiada leva por título Fíos e foi presentada baixo o lema Fäden.
O galardón está dotado con 7.000 euros, flor natural e diploma, e a proposta de concesión será elevada á Xunta de Goberno Local para a súa aprobación.
O xurado reuniuse este 24 de agosto, ás 12.15 horas, baixo a presidencia da concelleira de Cultura, Mónica González Fernández, e coa participación como secretaria da técnica de Cultura Mª Sonia García Paredes. Formaron tamén parte do órgano avaliador Darío Villanueva Prieto, membro da Real Academia Española; Ramón Villares Paz, catedrático de Historia; Xulio Xiz Ramil, xornalista; Fidel Fernán Vello, director do Grupo de Radio Principal; Luz Airado Bello, avogada e poeta; María Xosé Lamas Fernández, profesora e poeta, e Patricia Torrado Queiruga, poeta e gañadora da anterior edición do premio.
Nesta convocatoria presentáronse un total de 38 poemarios, todos eles considerados polo xurado como conformes coas condicións establecidas nas bases do certame. Tras a lectura e valoración das obras, os membros do xurado acordaron por unanimidade propoñer a concesión do premio ao poemario Fíos, de Jacobo Paz Limia.
O fallo foi recollido na acta levantada polo xurado, que sinala que a decisión se adopta tras poñer en común as valoracións dos poemas presentados. O premio recoñece así a obra poética de Jacobo Paz Limia no marco dunha das citas literarias de referencia do Concello de Vilalba.