José Torres Piñeiro presenta en Guitiriz o seu libro de poesía ‘Berros do Silencio’
A Escola Habaneira de Guitiriz acollerá o vindeiro venres 13 de novembro, ás 20.00 horas, a presentación de Berros do Silencio, o novo libro de poesía de José Torres Piñeiro, publicado pola editorial Toxosoutos.
A obra percorre diferentes experiencias e sentimentos da vida, desde as lembranzas da infancia e as raíces familiares ata a saudade, a memoria, a dor, as inxustizas e a esperanza. O título fai referencia a aqueles sentimentos que, por distintas circunstancias, permanecen calados durante anos, pero que atopan na poesía unha vía para expresarse.
A través dos seus versos, o autor dá voz ás vivencias persoais e ás preocupacións humanas e sociais, convidando os lectores a recoñecer nas palabras parte da súa propia historia.
Natural de Saavedra, no concello de Begonte, José Torres Piñeiro mantén unha estreita vinculación coa Terra Chá, presente nas súas lembranzas e na súa sensibilidade literaria. A súa actividade creativa abrangue tanto a literatura como a composición musical. A presentación en Guitiriz será unha nova oportunidade para achegar a súa poesía aos lectores da comarca, despois dos actos celebrados en Lugo, Rábade e Begonte.
Durante o encontro, o autor compartirá reflexións sobre a orixe do libro, o significado do título e a súa maneira de entender a poesía. O acto incluirá tamén unha lectura de poemas na que participarán José Torres Piñeiro, a poeta Amalia Méndez e o escritor Toño Núñez.
A actividade, aberta ao público, está promovida polo propio autor e conta coa colaboración do Concello de Guitiriz.