Eventos

A parroquia vilalbesa reunirá música, gastronomía e actividades para todas as idades nunha xornada que contará coas actuacións de Punto Clave, Los Satélites e París de Noia

A parroquia de Lanzós, no concello de Vilalba, volverá converterse nun punto de encontro para centos de veciños e visitantes coa celebración da XI Festa da Xuventude, que terá lugar o vindeiro sábado 17 de outubro baixo unha gran carpa instalada no campo cuberto da localidade.

A programación arrancará ás 14.00 horas cunha sesión vermú amenizada polo grupo Punto Clave, que dará paso á tradicional comida popular, servida polo cátering Chao da Brea. O menú incluirá xamón cocido, polbo á feira con cachelos, carrilleiras con patacas, sobremesa, café e bebida, cun prezo de 36 euros. Tamén haberá un menú infantil, dirixido a nenos de entre 6 e 10 anos, por 18 euros, mentres que os menores de cinco anos poderán asistir de balde.

A organización manterá aberta a venda de entradas ata o 13 de outubro a través de distintos establecementos colaboradores e dos integrantes da comisión de festas, lembrando que os tickets non admitirán reserva previa.

A partir das 19.00 horas, a festa continuará coa gran verbena, un dos momentos máis esperados da xornada, na que actuarán Punto Clave, Los Satélites e a orquestra París de Noia, tres das formacións máis recoñecidas do panorama musical galego.

Ademais da música e da gastronomía, a comisión organizadora anunciou que haberá colchonetas gratuítas para os máis pequenos e un sorteo de agasallos entre todas as persoas asistentes, co obxectivo de ofrecer unha celebración pensada para o desfrute de toda a familia.

Coa súa undécima edición, a Festa da Xuventude consolídase como unha das citas festivas máis destacadas do outono na comarca da Terra Chá, combinando tradición, convivencia veciñal e unha das verbena máis completas da tempada.