Lugo lembra as vítimas dos accidentes de tráfico cun chamamento á responsabilidade nas estradas

LugoXa | TerraChaXa | SarriaXa | AMariñaXa | RibeiraSacraXa
A subdelegada do Goberno participa no acto con motivo do Día Mundial en Recordo das Vítimas de Accidentes de Tráfico e traslada o seu apoio ás familias
lembranza-vitimas-accidentes-de-trafico
16 Nov 2026

Olimpia López, subdelegada do Goberno en Lugo, participou hoxe no acto con motivo do Día Mundial en Recordo das Vítimas de Accidentes de Tráfico, unha xornada dedicada a lembrar as persoas falecidas e feridas nas estradas e a acompañar as súas familias. Tamén asistiron Alberto Rodríguez, xefe provincial de Tráfico; Raquel Alborés, comandante da Garda Civil; Miguel Fernández, deputado provincial de Formación, Ensino e Economía; e Pablo Rivera, deputado provincial de Promoción Económica e Social.

Durante a súa intervención, López lembrou ás persoas que perderon a vida en accidentes de tráfico e para as familias que conviven coa súa ausencia. «Ningunha palabra pode reparar a súa perda, pero queremos que saiban que non esquecemos aos seus seres queridos», sinalou. A subdelegada lembrou tamén as persoas que sobreviviron a un sinistro e continúan afrontando as súas consecuencias.

López agradeceu o traballo dos axentes de tráfico, dos equipos de emerxencias e do persoal sanitario que interveñen nos accidentes e prestan asistencia ás vítimas.

A subdelegada fixo un chamamento á responsabilidade na condución e advertiu de que unha distracción, unha imprudencia ou circular a velocidade inadecuada poden ter consecuencias irreversibles. Neste sentido, reafirmou o compromiso da Subdelegación do Goberno coa prevención e coa mellora da seguridade viaria.

«Detrás de cada cifra está o que importa: unha persoa, unha familia e unha historia que merecen ser lembradas», destacou López, que concluíu a súa intervención solicitando un minuto de silencio en memoria de todas as vítimas.

0.14776110649109