Mil mulleres rurais reuniranse en Lugo para reivindicar o seu liderado e os seus dereitos
O Pazo de Feiras e Congresos de Lugo acollerá este xoves, 15 de outubro, unha xornada na que participarán preto de 1.000 mulleres para visibilizar o seu papel no medio rural e reclamar avances en igualdade, dereitos e oportunidades. O encontro, organizado por FADEMUR Galicia coa colaboración da Deputación de Lugo, celebrarase baixo o lema "Mulleres rurais: liderado, xustiza e dereitos" e servirá tamén para conmemorar os vinte anos da federación galega.
A programación combinará intervencións institucionais, experiencias profesionais, propostas culturais e espazos para dar a coñecer iniciativas empresariais impulsadas por mulleres. A entidade aproveitará a celebración para insistir na necesidade de mellorar o acceso das mulleres á terra e ao financiamento, aumentar a súa presenza nos órganos de decisión e avanzar nunha Política Agraria Común con maior perspectiva de xénero.
FADEMUR Galicia tamén reclama á Xunta que impulse o Estatuto das Mulleres do Rural de Galicia, cuxa elaboración foi aprobada no Parlamento hai tres lexislaturas e que, segundo denuncia a organización, continúa sen materializarse. A federación lembra ademais que as axudas da PAC que reciben as mulleres galegas son un 38 % inferiores ás dos homes e pide que a política agraria que entre en vigor en 2028 sexa máis xusta e igualitaria.
Unha mesa redonda sobre o papel das mulleres no sector agroalimentario
A apertura oficial está prevista para as 11:00 horas, coa participación da presidenta de FADEMUR Galicia, Verónica Marcos; a responsable estatal da organización, Teresa López; o secretario xeral de Unións Agrarias-UPA, Roberto García, e a presidenta da Deputación de Lugo, Carmela López. Ás 11:50 horas presentarase o vídeo "20 anos, poñendo as mulleres rurais no foco", seguido, ás 12:10 horas, dunha intervención da Valedora do Pobo de Galicia, María Dolores Fernández Galiño.
Un dos principais contidos será o coloquio "Mulleres rurais en primeiro plano", previsto para as 12:40 horas. Nel participarán Montse Cortiñas, vicesecretaria xeral de UPA; M.ª Carmen Sánchez, responsable de Embutidos Suarna, empresa familiar de elaboración artesanal situada en Navia de Suarna, e Raquel García, responsable comercial de produtos frescos de Vegalsa-Eroski.
As convidadas achegarán experiencias de diferentes ámbitos da cadea agroalimentaria, desde a representación sindical do sector primario ata a elaboración e distribución de alimentos. A xornada pretende amosar como o traballo e a iniciativa das mulleres contribúen a manter a actividade económica e o emprego nos municipios rurais.
Primeira edición dos Premios María José Arcos
A programación incluirá ás 13:15 horas a entrega dos primeiros Premios María José Arcos, creados para recoñecer a mulleres que destacan pola súa traxectoria, compromiso ou contribución en distintos ámbitos da vida rural galega. Os galardóns lembran a figura de María José Arcos, traballadora de Unións Agrarias e unha das persoas fundamentais na creación e posta en marcha de FADEMUR en Galicia.
A organización destaca que a federación pasou de reunir vinte asociacións na súa orixe a agrupar arredor dun cento na actualidade. Ao longo destas dúas décadas, traballou na promoción da igualdade, a prevención da violencia de xénero, o emprendemento, o recoñecemento dos coidados e o impulso do asociacionismo como ferramenta para dinamizar as localidades rurais.
A mostra de produtos artesanais e agroalimentarios será outro dos eixes do encontro. A previsión inicial da organización apunta á participación de case corenta expositoras, que poderán dar a coñecer e comercializar as súas elaboracións e proxectos.
Tras o peche institucional, previsto para as 13:30 horas coa participación do deputado provincial Miguel Fernández e da secretaria xeral de FADEMUR Galicia, Rosa Arcos, actuará a regueifeira Lupe Blanco. Pola tarde, o programa continuará coas representacións de Teté Teatro e coa música tradicional das pandereteiras de A Volta do Agro.