Moncelos celebrará as súas festas patronais cun intenso programa musical e gastronómico
A parroquia de Moncelos, no concello de Abadín, xa ten todo preparado para celebrar as súas tradicionais festas na honra de Santiago Apóstolo e Santa Ana, que se desenvolverán entre os días 24 e 26 de xullo cun programa no que a música, a gastronomía e os actos relixiosos serán os grandes protagonistas.
Os festexos arrancarán o venres cunha churrascada popular prevista para as 22.00 horas. A xornada inaugural estará amenizada pola Batucada de Abadín e continuará cunha verbena nocturna a cargo do dúo Eclipse, encargado de poñer ritmo á primeira noite das celebracións.
O sábado 25, coincidindo coa festividade de Santiago Apóstolo, a programación comezará ás 13.30 horas cunha misa solemne cantada pola Coral Polifónica de Abadín. A continuación celebrarase a tradicional procesión e a sesión vermú, que contará coa actuación de Asubíos da Chaira e da orquestra Channel. Xa pola noite, a festa continuará cunha gran verbena protagonizada pola propia orquestra Channel e pola formación Royal Espectáculo. Ademais, durante a velada realizarase o sorteo de 500 puntos.
As actividades concluirán o domingo cunha nova misa solemne e procesión a partir das 13.30 horas. A sesión vermú e a verbena de despedida correrán a cargo da orquestra Los Key, que será a encargada de pechar tres días de celebracións na localidade.