Mourence organiza a súa segunda andaina veciñal para descubrir o patrimonio da parroquia
A veciñanza de Mourence celebrará o domingo 14 a segunda edición da súa andaina veciñal, unha iniciativa que busca fomentar a convivencia, a actividade física e o coñecemento do patrimonio local a través dun percorrido polos lugares máis emblemáticos da parroquia.
A saída está prevista para as 09.30 horas desde a Casa Escola, punto que tamén servirá como chegada ao remate da ruta. O itinerario terá unha distancia aproximada de 8,5 quilómetros e permitirá visitar espazos de gran valor histórico e paisaxístico como o Camiño Real, o Cruceiro dos Contos e o Muíño do Polo.
A actividade está aberta a toda a veciñanza e os organizadores animan á participación para descubrir e poñer en valor a riqueza patrimonial e natural da parroquia. Ademais, recomendan aos asistentes acudir con calzado cómodo e levar auga para realizar o percorrido nas mellores condicións.
A andaina converterase así nunha nova oportunidade para compartir unha xornada de lecer ao aire libre, reforzar os lazos comunitarios e coñecer máis de preto a historia e a beleza da contorna de Mourence.