Muras organiza a carreira nocturna a Milla das Estrelas o venres
Tralo éxito do ano pasado, o Concello de Muras acollerá este venres 11 unha nova edición da Milla das Estrelas, unha carreira popular que se celebrará a partir das 21.00 horas con saída desde a Casa do Concello.
A proba, organizada no marco das Carreiras Populares de Terra Chá, forma parte do circuíto Terra Chá Challenge e está promovida pola Xunta de Galicia, a Unión Europea, o Ministerio de Agricultura, Pesca e Alimentación e o GDR Terra Chá.
A Milla das Estrelas propón unha cita deportiva nocturna para todas aquelas persoas afeccionadas ao atletismo e ás carreiras populares, nunha contorna marcada pola paisaxe e o ambiente nocturno de Muras.
As persoas interesadas en participar poderán formalizar a súa inscrición ata o martes a través da páxina web terrachallenge.es.
A organización anima a veciñanza e ás persoas afeccionadas ao deporte a participar nesta nova edición da proba, que volverá reunir corredores e corredoras en Muras nunha xornada deportiva pensada para gozar do atletismo nun horario diferente ao habitual.