Muras prepara a XXXVIII Feira do Poldro e do Gando do Monte, que se celebrará o 27 de setembro
Muras xa ten data para unha das súas citas máis destacadas do calendario: a XXXVIII Feira do Poldro e do Gando do Monte celebrarase o próximo 27 de setembro na Gañidoira, nunha nova edición desta Festa de Interese Turístico Galego.
O Concello de Muras deu a coñecer o cartel da edición de 2026, coa que comeza a conta atrás para unha xornada dedicada á promoción da gandaría e do mundo do cabalo, así como á posta en valor do rural e das tradicións vinculadas ao territorio.
A feira volverá reunir na Gañidoira animais e produtores nunha celebración que ten entre os seus principais protagonistas os poldros e o gando do monte. A cita busca tamén reivindicar a actividade gandeira e o aproveitamento dos recursos do territorio, ao tempo que contribúe a dar visibilidade ao patrimonio rural de Muras.
A organización corre a cargo do Concello de Muras, que conta coa colaboración da Xunta de Galicia, ABANCA, a Asociación de Criadores do Cabalo de Pura Raza Galega-Puraga e Atila Cabaleiros Muras. Tamén participan a Vicepresidencia da Deputación de Lugo e outras entidades vinculadas ao sector.
A XXXVIII Feira do Poldro e do Gando do Monte chega así cunha nova edición coa intención de manter viva unha celebración que forma parte da identidade de Muras e que cada ano converte a Gañidoira nun punto de encontro para o sector gandeiro, os afeccionados aos cabalos e o público en xeral.
O Concello xa anima a reservar a data do 27 de setembro para participar nunha das grandes citas do rural galego e gozar dunha xornada na que tradición, gandaría e cultura do monte volverán ser os grandes protagonistas.