Nace Lar do Regueiro, un innovador proxecto de vivenda colaborativa en Friol
O municipio de Friol acollerá a presentación pública de Lar do Regueiro, un novo proxecto de vivenda colaborativa que aposta por un modelo de convivencia baseado na cooperación, a participación e o apoio mutuo. O acto terá lugar o vindeiro 25 de abril ás 11:00 horas no Salón de Actos do Centro Sociocultural da localidade.
A iniciativa diríxese a todas aquelas persoas interesadas en coñecer alternativas residenciais que promovan a autonomía persoal sen renunciar á vida en comunidade. Durante o evento, daranse a coñecer as liñas xerais do proxecto, así como o funcionamento deste modelo de vivenda, ofrecendo ademais a posibilidade de resolver dúbidas e establecer un primeiro contacto co equipo impulsor.
Lar do Regueiro nace coa vocación de ofrecer unha fórmula de vida que combine independencia e comunidade, fomentando valores como a solidariedade, o coidado mutuo e a participación activa. Segundo explicou o seu presidente, José Manuel Díaz, o proxecto xorde da necesidade de repensar os modelos actuais de convivencia, situando ás persoas no centro e promovendo redes reais de apoio entre veciños.
O responsable da iniciativa subliñou tamén que non se trata unicamente dunha proposta residencial, senón dunha comunidade dinámica na que cada persoa pode manter a súa independencia ao tempo que forma parte dun entorno colectivo enriquecedor.
A presentación constitúe unha oportunidade para achegarse a este modelo residencial emerxente e explorar novas formas de convivencia adaptadas ás necesidades da sociedade actual.