Natalia Méndez será homenaxeada en As Pontes con motivo da festividade de Santa Icía
A asociación de músicos Ruada de As Pontes dedicará a homenaxe de Santa Icía deste ano á cantante Natalia Méndez, exvocalista da orquestra Panorama. A homenaxe enmárcase nun amplo calendario de actividades organizado con motivo desta festividade, que inclúe preto de vinte concertos ao longo do mes de novembro.
A artista, que hai anos deixou os grandes escenarios para centrarse na educación, será a protagonista dun dos actos principais da programación, que terá lugar o vindeiro 21 de novembro, ás 19.00 horas, no auditorio municipal Alovi.
O recoñecemento servirá para render tributo a unha traxectoria musical que levou a Natalia Méndez a formar parte de importantes formacións e a participar en diferentes escenarios. Tras afastarse da actividade musical profesional, a pontesa volveu cantar en distintas ocasións e converteuse nunha presenza habitual en programas da TVG.
O acto contará coa participación da Escola Municipal de Canto e Pandeireta Tradicional, da Banda Xuvenil de Música e da Banda de Música Cultural e Recreativa.
Pero a programación de Santa Icía arrancará este sábado coa gala solidaria da AECC, na que actuarán a rondalla Vila das Pontes, No Cómboro e Arrivederci. A cita será ás 19.00 horas no Alovi e as entradas terán un prezo de cinco euros.
O calendario continuará o día 11 cun concerto da Escola Municipal de Acordeóns, ás 19.00 horas no Alovi, mentres que o día 13 será a quenda de Lidia India, que actuará ás 20.30 horas na Casa Dopeso nun concerto organizado polo Concello e Agadic.
O día 14 celebrarase o primeiro festival, ás 19.00 horas no Alovi, coa participación de No Cómboro, Feroces da Galgueira e Canavella. Ao día seguinte, ás 20.00 horas, actuará a Escola de Música Tradicional de As Pontes. A programación continuará o día 17 co alumnado de guitarra do conservatorio e o 18 co alumnado de vento, ambos os dous concertos ás 18.00 horas na Casa Dopeso.
Esa mesma xornada, ás 20.00 horas, a Casa Dopeso acollerá tamén unha actuación da Coral de Endesa e da agrupación Chorima de Castro, de Narón. O día 19 será a quenda do alumnado de corda do conservatorio, ás 18.00 horas, e o día 20 actuarán o alumnado de piano, ás 17.00 horas, e o Ensemble de Contrabaixos, ás 20.30 horas.
A programación pecharase o día 22 cunha misa en honra a Santa Icía na igrexa de Ribadeume, seguida dunha ofrenda floral no monumento aos músicos. A agrupación Canavella será a encargada de poñer o acompañamento musical a este último acto.