O 10º Repsol EcoRallye A Coruña reagrúpase nas Pontes antes do tramo final
O 10º Repsol EcoRallye A Coruña alcanzou este sábado un dos seus fitos estratéxicos máis esperados coa chegada da caravana de vehículos ao reagrupamento das Pontes. Tras unha intensa xornada matinal de navegación e precisión, os equipos completaron a parada intermedia na localidade pontesa, un punto neurálxico que serve para vertebrar a promoción turística do interior provincial e permitir aos deportistas axustar as súas estratexias de regularidade e xestión de batería. A cita, organizada pola Escudería La Coruña e respaldada por Repsol como patrocinador principal, viviu neste enclave un valioso descanso táctico antes de encarar o tramo decisivo da competición.
Esta décima edición, que por terceiro ano consecutivo puntúa para a FIA Eco Rally Cup e forma parte do Campionato de España de Enerxías Alternativas (CEEA RACE), pasará á historia tras ter fixado un récord absoluto de participación con 57 equipos inscritos, dos que quedan 53 en competición.
Entre a nómina de competidores figuran as máximas figuras do panorama mundial e nacional, destacando a presenza simultánea dos tres últimos campións do mundo da especialidade: Guido Guerrini, Michal Žďárský e Eneko Conde. Xunto a eles tomaron parte nomes de referencia como o expiloto de Fórmula 1 Stefano Modena, o xornalista especializado Albert Fábrega e unha destacada representación de campións de España da talla de José Manuel Pérez Aicart, Laura Aparicio, Toni Luján, Shirley Fernández e José Manuel Pizarro, medindo as prestacións de ata 16 marcas de automoción achegadas por unha decena de concesionarios colaboradores.
Para soster o maior percorrido da súa historia —con 586,997 quilómetros totais e 425,507 quilómetros cronometrados a través de 35 municipios galegos—, a competición contou cun impresionante despregamento loxístico no seu epicentro operativo da praza de María Pita. Alí, Repsol instalou un parque de recarga de enerxía 100 % renovable dotado con 52 puntos de subministración e unha potencia global de 385 kW/h, permitindo dar servizo continuo á nutrida grella formada por 43 vehículos 100% eléctricos, sete híbridos enchufables e sete híbridos non enchufables.
Á espera de computar as penalizacións definitivas, os controis horarios da xornada e os índices de consumo de cada montura, a clasificación provisional á súa chegada ás Pontes queda encabezada por Michal Žďárský e Jakub Nubelek, seguidos por Eduardo Carpinteiro-Albino e José Carlos Figueiredo; mentres que en terceira posición están Antoine Dechamps e Laurent Secretin.
Superado o trámite en terras pontesas, o 10º Repsol EcoRallye A Coruña entra de cheo no seu epílogo. Ás tripulacións só lles queda emprender a viaxe de volta á céntrica praza de María Pita para dar por concluída a competición, certificar as medicións enerxéticas finais e proceder á entrega oficial de trofeos que coroará os triunfadores desta edición de aniversario.