O 19 de marzo e o 17 de maio serán festivos en Galicia en 2027
O Consello da Xunta aprobou o calendario laboral de Galicia previsto para 2027, no que se inclúen como festivos propios “o 19 de marzo, día de San Xosé, e o 17 de maio, Día das Letras Galegas”.
Tal e como lembrou o titular do Executivo galego, a normativa estatal, fixada polo Real Decreto 2001/1983, establece as 14 festas anuais de ámbito nacional non recuperables, remuneradas e de carácter obrigatorio. Destes 14 festivos, “dous deles elíxeos cada concello”.
Dos outros 12 restantes, 9 son de carácter obrigatorio e non substituíbles agás que coincidan en domingo: 1 de xaneiro, Venres Santo (26 de marzo de 2027), 1 de maio, 15 de agosto, 12 de outubro, 1 de novembro, 6 de decembro, 8 de decembro e 25 de decembro. No ano 2027 hai un festivo nacional de carácter obrigatorio que coincide en domingo: o 15 de agosto (Asunción da Virxe), que Galicia propón substituír polo 17 de maio (Día das Letras Galegas).
O presidente sinalou que os outros tres festivos de carácter nacional son opcionais, é dicir, poden ser substituídos polas comunidades autónomas: o 6 de xaneiro, que en Galicia nunca se cambia, salvo que coincida en domingo; o Xoves Santo (que en 2027 se celebrará o 25 de marzo), que na Comunidade galega non se modifica de forma tradicional, e dáse ás comunidades a opción de escoller como opcional entre o 19 de marzo e o 25 de xullo. A Xunta sempre elixe o 25 de xullo, xa que é o Día Nacional de Galicia, tal e como quedou establecido polo Decreto 8/1978, do 10 de xullo, pero, ao coincidir en domingo, o próximo ano elíxese o 19 de marzo (San Xosé).
Polo tanto, as festas do calendario laboral para Galicia en 2027 que se determinan son: 1 de xaneiro (Aninovo), 6 de xaneiro (Epifanía do Señor - Día de Reis), 19 de marzo (San Xosé), 25 de marzo (Xoves Santo), 26 de marzo (Venres Santo), 1 de maio (Festa do Traballo), 17 de maio (Día das Letras Galegas), 12 de outubro (Festa Nacional de España), 1 de novembro (Todos os Santos), 6 de decembro (Día da Constitución), 8 de decembro (Inmaculada Concepción) e 25 de decembro (Natividade do Señor). Ademais destes días, cada concello determina dúas xornadas festivas como propias da súa localidade.