O ano hidrolóxico da CHMS remata cos encoros ao 58,34 %, un 3,15 % por riba da media histórica
A Confederación Hidrográfica do Miño-Sil, Organismo autónomo dependente do Ministerio para a Transición Ecolóxica e o Reto Demográfico, fai balance do ano hidrolóxico 2025-2026 que remata cos encoros ao 58,34 % da súa capacidade, o que supón un 3,15 % por riba da media histórica.
Desde o 1 de outubro de 2025, a precipitación acumulada anual media de 1.230 l/m² supón un 7,4 % por riba da media histórica de referencia, serie 1980/81 - 2017/18 que presenta un valor medio de 1.144,8 l/m².
“O ano hidrolóxico 2025/26 caracterízase como “húmido” ao situarse o rexistro anual en 1.230,0 l/m²; se ben, pódense diferenciar dous períodos, un húmido, entre novembro e febreiro, destacando sobre todo febreiro polo valor máximo histórico acadado; e outro de escasas chuvias, entre marzo e setembro, de carácter seco ou moi seco”, explicou José Antonio Quiroga, presidente do organismo.
A característica anual por sistemas é a seguinte: concas do Sil Inferior e Miño Alto, “normal”; “húmido” nas concas do Cabe, Sil Superior e Miño Baixo; e “moi húmido” na conca do Limia.
Os encoros ao peche do ano hidrolóxico atópanse ao 58,34 % da súa capacidade máxima; este volume é un 8,82 % menor que a cantidade de auga encorada hai un ano, 67,16 %, e un 3,15 % maior que o enchido medio histórico nestas datas, 55,18 %.