O BNG das Pontes demanda ao Goberno local unha reclamación contra os fondos de transición xusta
No último Pleno Ordinario de setembro, no apartado de rogos e preguntas, o BNG das Pontes advertía ao goberno municipal do PSOE sobre da posibilidade, "máis que fundada", de que a Xunta procedera a convocar as axudas dos fondos da Transición Xusta a proxectos xeradores de emprego nun ámbito xeográfico superior ao das áreas de peche de centrais térmicas, nomeadamente aos 19 concellos galegos das zonas de Meirama (Carral, Cerceda, A Laracha, Ordes e Tordoia) e As Pontes (Cabanas, A Capela, Cerdido, Ferrol, Mañón, Moeche, Monfero, Muras, Ortigueira, As Pontes, San Sadurniño, As Somozas, Vilalba e Xermade). "Dende o PSOE afirmábase que, logo dos contactos coa Xunta, ter a convicción de que se aplicarían, cando menos, criterios de discriminación positiva para os concellos citados, incluídos os da provincia de Lugo. Con todo, o BNG poñíase á disposición do Concello para evitar o trato desfavorable das zonas da chamada Transición Xusta galegas".
Afirman os nacionalistas que as advertencias e sospeitas do BNG veñen de confirmarse coa publicación no DOG das bases e da convocatoria, en competencia competitiva, dos préstamos para proxectos empresariais de investimento creadores de emprego, na modalidade pequenas e medianas empresas, previstos no Programa do Fondo de Transición Xusta 2021-2027.
Explican que nelas establécese como ámbito xeográfico a totalidade da provincia da Coruña, excluíndo polo tanto aos concellos de Muras, Vilalba e Xermade; para proxectos localizados no resto de concellos das zonas de Transición Xusta, o baremo fixa unha puntuación de tan só 5 nos 11 criterios de priorización sobre un máximo de 105 puntos. Ademais, no caso de empate, o de localización sería o octavo criterio en aplicarse.
"Tamén se debe subliñar, como aspecto moi negativo, que, aínda que o criterio de creación de emprego é o de maior peso con 35 puntos e prioritario no caso de empate, á contratación do persoal que está na bolsa de emprego do Instituto de Transición Xusta, algún procedente das Auxiliares e do transporte do carbón, correspóndelle un máximo dun punto", din.
O BNG ten solicitado unha reunión urxente da Comisión de Industria do Concello para analizar, entre outros aspectos, a posibilidade de presentar un recurso contra das bases, por ser claramente contrarias aos intereses das Pontes, agravada pola situación local de falta de solo industrial; tamén entende que debería ser un asunto preferente para desaparecido, por decisión unilateral do PSOE, Comité de Crise.