O BNG esixe á Xunta que autorice a terceira unidade de Infantil no CEIP Virxe do Corpiño de Begonte
O BNG vén de presentar no Parlamento galego unha batería de iniciativas para reclamar á Xunta de Galiza que rectifique a súa decisión respecto do CEIP Plurilingüe Virxe do Corpiño, en Begonte, e autorice unha terceira unidade de Educación Infantil, tal e como lle corresponde ao centro de acordo coa normativa vixente.
A deputada do BNG Olalla Rodil denuncia que a Xefatura Territorial de Educación de Lugo autorizou unicamente dúas unidades mixtas, agrupando alumnado de diferentes niveis, malia que os datos de matrícula e a propia lexislación determinan que o centro debe contar con tres.
No presente curso 2026/2027, o CEIP Virxe do Corpiño conta con 27 estudantes de Educación Infantil. Entre o alumnado hai crianzas con necesidades educativas especiais e grao máximo de dependencia, polo que, aplicando o cómputo establecido no artigo 40.2 da Lei 5/2024, a cifra ascende a efectos de ratio a 29 alumnas e alumnos.
“Non estamos diante dunha petición extraordinaria nin dun privilexio. Estamos reclamando simplemente que a Xunta cumpra a lei que ela mesma aprobou e dote o Virxe do Corpiño dos recursos que lle corresponden”, afirmou Rodil.
“A solución da Xunta é concentrar máis alumnado, de diferentes idades e con necesidades educativas diversas, en menos aulas. Isto dificulta o traballo do profesorado e, sobre todo, empeora a atención educativa que reciben as crianzas”, advertiu Olalla Rodil.
Tanto a dirección do centro como a ANPA trasladaron en reiteradas ocasións á Administración educativa a realidade do Virxe do Corpiño e a necesidade de habilitar esa terceira unidade. Para o BNG, resulta especialmente grave que Educación manteña a súa decisión malia coñecer as circunstancias concretas do alumnado.
“Cando nunha aula hai crianzas con necesidades educativas especiais, reducir recursos e incrementar as ratios vai exactamente na dirección contraria á dunha escola pública inclusiva. A inclusión non pode quedar nun discurso: necesita profesorado, unidades e recursos suficientes”, subliñou Rodil.
Por este motivo, o BNG rexistrou unha batería de iniciativas parlamentarias para coñecer os motivos polos que a Consellaría decidiu autorizar só dúas unidades, esixir explicacións sobre o incumprimento das ratios legais e reclamar a autorización inmediata dunha terceira unidade de Educación Infantil no CEIP Plurilingüe Virxe do Corpiño.
“A Xunta aínda está a tempo de rectificar. O que reclamamos é unha solución inmediata para que o curso se desenvolva coas tres unidades que é o marca a propia lei da Xunta de Galiza”, concluíu Olalla Rodil.