O Castro FSF pasa o primeiro filtro e clasifícase para oitavos da Copa da Raíña e o Vilalba FS queda eliminado
A Copa da Raíña de fútbol sala deixou un balance desigual para os dous equipos da provincia. O FSF Castro Bloques Cando conseguiu unha contundente vitoria a domicilio ante o Segosala, ao que derrotou por 0-4 con goles de Cris, Natalinha, por partida dobre, e Dani. Pola súa banda, o Vilalba FS non puido superar a primeira eliminatoria e despídese da competición.
O conxunto castrexo afronta con ambición esta edición do torneo. A pasada tempada chegou ata os cuartos de final, pero non conseguiu o pase ás semifinais. Este ano aspira a romper esa barreira e loitar polo título, que se decidirá na fase final prevista para o mes de abril. O seu seguinte compromiso, correspondente aos oitavos de final, será o vindeiro 19 de xaneiro.
Pola súa parte, o Vilalba FS xogou na casa contra o Rodiles FS A e perdeu por un contundente 1-7. As vilalbesas atopáronse cun rival implacable que acabou impoñéndose con claridade, malia que aos cinco minutos o marcador reflectía un empate a un gol, despois do tanto conseguido pola local Myrielen.