O Centro Cultural e Recreativo de Vilalba organiza un Magosto Infantil o venres 13 de novembro
O Centro Cultural e Recreativo (CCR) de Vilalba celebrará hoxe, venres 13 de novembro, unha nova edición do seu Magosto Infantil, unha actividade pensada para que os máis pequenos desfruten dunha tarde de xogos, diversión e tradición arredor do outono.
A xornada dará comezo ás 17:00 horas e contará cunha programación variada na que non faltarán os xogos populares, os contacontos e os obradoiros de manualidades. Unha proposta coa que o CCR busca ofrecerlles aos nenos e nenas un espazo de lecer e convivencia, ao tempo que mantén vivas as tradicións propias desta época do ano.
As familias interesadas en participar deberán inscribir previamente os seus fillos e fillas na cafetería do CCR ou a través do correo electrónico ccrvilalba@gmail.com.
A iniciativa pretende converter a tarde nunha ocasión especial para que a cativada goce do ambiente do magosto e das actividades propias desta celebración tradicional.