O Club de Vela Fluvial As Pontes abre as inscricións para os cursos de vela do verán no lago
O Club de Vela Fluvial As Pontes puxo en marcha unha nova edición dos seus cursos de vela lixeira para este verán, unha iniciativa dirixida a nenos e nenas de entre 7 e 15 anos que se desenvolverá no Lago das Pontes entre o 6 de xullo e o 28 de agosto.
A actividade ten como obxectivo achegar aos máis novos ao deporte da vela nun entorno seguro, natural e privilexiado, promovendo ao mesmo tempo o contacto coa natureza, a práctica deportiva e a adquisición de valores como a autonomía e a confianza persoal.
Os cursos organizaranse en quendas semanais, de luns a venres, en horario de 10.00 a 14.00 horas. Cada participante recibirá unha formación de 20 horas totais, aprendendo desde os conceptos básicos da navegación ata as técnicas fundamentais para manexar unha embarcación de vela.
Desde a entidade organizadora destacan que a proposta combina aprendizaxe e lecer, permitindo aos participantes facer novas amizades e gozar dunha experiencia ao aire libre nun dos espazos naturais máis emblemáticos do municipio.
As inscricións xa están abertas e as prazas estarán condicionadas á formación de grupos cun mínimo de cinco cursillistas. Ademais, o club ofrece prezos accesibles e descontos para aquelas persoas que se anoten en varias semanas.
As persoas interesadas poden obter máis información e formalizar a súa inscrición a través do Club de Vela Fluvial As Pontes, que conta coa colaboración do Concello das Pontes para o desenvolvemento desta actividade estival.