O Club Deportivo Santaballés celebrará o 23 de maio a súa festa de fin de tempada
O Club Deportivo Santaballés organizará o vindeiro 23 de maio a súa tradicional festa de fin de tempada, unha xornada de convivencia que combinará deporte, música e gastronomía para xogadores, familias e afeccionados.
As actividades comezarán a partir das 11.00 horas con partidos de fútbol dirixidos tanto ás categorías máis pequenas como aos equipos de adultos. Xa ao mediodía, ás 14.00 horas, celebrarase unha sesión vermú amenizada polo grupo EvenTec.
A comida dará comezo ás 15.00 horas e estará servida por Catering Valenciaga. O menú incluirá viños Ribeiro branco e tinto, auga e refrescos, ademais de aperitivo, empanada, polbo á feira, churrasco mixto con patacas e ensalada, torta de Santiago e café de pota.
A organización fixou o prezo da comida en 38 euros para adultos e 20 euros para nenos e nenas de entre 3 e 11 anos, mentres que os menores de 3 anos poderán asistir de balde.
A festa continuará a partir das 18.00 horas con música a cargo do grupo EvenTec, poñendo o peche a unha xornada pensada para reunir á familia do club e á veciñanza.
Os tíckets poden retirarse na Parrillada Área Blanca, no Restaurante Naseiro ou a través de calquera membro da directiva do club. O prazo límite para a súa adquisición remata o 18 de maio.