O Concello de Abadín mellora estradas municipais e dota de servizos a nova casa consistorial
Trala pavimentación con aglomerado en quente en varias parroquias de Abadín con cargo ao Fondo de Compensación Ambiental, o Concello vén de adxudicar agora máis proxectos de cara á mellora da rede viaria municipal incluídos no Plan Único da Deputación.
As intervencións suporán a aplicación de aglomerado en quente con 5 cm de espesor e o acondicionamento de gabias en zonas de Espiñarcao, Abeledo, As Goás, Baroncelle e A Graña.
Aos 217.924 euros que supoñen estas melloras hai que engadir 105.590 euros para distintas actuacións de cara ao subministro e colocación de falsos teitos, revestimentos interiores, carpintería de madeira, aparatos sanitarios e o revestimento de escaleiras interiores da nova Casa do Concello.
Outras melloras
O Concello, con axuda de Agader, remataba recentemente as obras de mellora no Centro de Día. Trátase da reforma do almacén no planta baixa e o acondicionamento dunha nova sala na planta superior que supuxeron o investimento de arredor de 70.000 euros.
Tamén está a acometer o Concello obras de saneamento en Gontán, no paseo da Roxica. E proximamente prevé adxudicar a reforma do Punto de Atención á Infancia.