O Esteo organiza un campus de fútbol sala para nenos e nenas nas Pontes durante o mes de xuño
O Esteo FS celebrará entre os días 22 e 25 de xuño unha nova edición do seu Campus de Fútbol Sala Verán 2026, unha iniciativa dirixida a rapaces e rapazas de entre 6 e 15 anos que combina formación deportiva, aprendizaxe e actividades lúdicas arredor deste deporte.
O campus terá como escenario o Pavillón Polideportivo Municipal da Fraga, nas Pontes, e desenvolverase en horario de mañá, de 09.30 a 14.00 horas. A actividade estará coordinada polo xogador do club Adrián Martínez Vara, coñecido deportivamente como Adri, quen compartirá coa mocidade participante a súa experiencia e coñecementos sobre o fútbol sala nun ambiente formativo e participativo.
Desde o club destacan que esta proposta busca fomentar a práctica deportiva entre os máis novos, ao tempo que promove valores como o compañeirismo, o esforzo e o traballo en equipo. Ademais das sesións de adestramento e das diferentes actividades programadas, a inscrición inclúe unha equipación completa e un tentempié diario para todos os asistentes.
O prezo de participación é de 70 euros e as prazas son limitadas. A organización anima ás familias interesadas a formalizar a inscrición canto antes debido á alta demanda prevista para esta actividade estival.
Con esta iniciativa, O Esteo continúa apostando pola promoción do fútbol sala de base e pola creación de espazos de convivencia e formación deportiva para a mocidade da comarca.