O GDR Terra Chá apoiará este ano 18 proxectos no rural e deixa 13 iniciativas en lista de agarda
O Grupo de Desenvolvemento Rural (GDR) Terra Chá apoiará este ano un total de 18 proxectos cunha achega de 1,34 millóns de euros procedentes do programa Leader 2026. A convocatoria experimenta un importante incremento de fondos con respecto ao exercicio anterior, ao pasar dos 600.000 euros a unha dotación que supera o dobre desa cantidade e se achega ao triplo. Ademais, outras 13 iniciativas quedaron en lista de agarda, un dato que evidencia a elevada demanda destas axudas e o interese por impulsar novos investimentos no territorio.
A resolución aprobada polo GDR corresponde a unha convocatoria na que se presentaron 48 solicitudes. Delas, 37 eran iniciativas produtivas, das que 21 recibiron unha valoración favorable. Finalmente, nove proxectos serán os primeiros beneficiarios das subvencións produtivas, mentres que os restantes permanecerán á espera dunha posible ampliación dos fondos. O importe solicitado inicialmente para este apartado ascendía a 1,79 millóns de euros, fronte aos 1,056 millóns finalmente concedidos.
As actuacións empresariais apoiadas permitirán desenvolver investimentos en distintos sectores e concellos da comarca. Entre as propostas figuran a creación de dúas pensións e un establecemento de turismo rural, dúas estacións de servizo, a ampliación dun despezamento, unha empresa de construción e reformas, unha lavandería autoservizo e unha nave industrial destinada á exposición e venda de maquinaria. Os proxectos contribuirán a consolidar 15 postos de traballo e crear outros 14.
A convocatoria inclúe tamén tres iniciativas privadas non produtivas, que mobilizarán 44.300 euros de investimento e recibirán 37.200 euros en subvencións. As actuacións céntranse na mellora dun espazo de ocio da asociación veciñal O Miño, na adquisición de equipamento para a actividade de xardinería do centro ocupacional de Vilalba e en recursos destinados a Fogares Lar de Muimenta.
Pola súa banda, as axudas para proxectos públicos sen ánimo de lucro permitirán financiar seis intervencións en Pastoriza, Cospeito, Guitiriz, Castro de Rei, Xermade e Vilalba. Estas iniciativas contan cun investimento conxunto próximo aos 380.000 euros, dos que 255.000 serán achegados polos fondos Leader. Entre as actuacións previstas están a continuidade das escavacións no castro de Saa, en Pastoriza; a mellora dos servizos interxeracionais no parque periurbano de Feira do Monte; a ampliación dunha área recreativa en Xermade e a renovación dun parque infantil en Castro de Rei.
Tamén se contemplan actuacións relacionadas coa accesibilidade e a eficiencia enerxética, como a rehabilitación da fachada dun edificio en Guitiriz e a mellora da accesibilidade en Vilalba.
O importe máximo das axudas por proxecto produtivo será de 150.000 euros, mentres que no caso das iniciativas privadas non produtivas o límite está fixado en 25.000 euros. Unha vez aprobada a proposta pola directiva do GDR Terra Chá, o seguinte paso será a publicación da resolución definitiva. As entidades e persoas beneficiarias disporán de prazo ata 2028 para executar os investimentos subvencionados.