O IES Pedregal de Irimia bautiza unha aula co nome da economista María Loureiro García
O IES Pedregal de Irimia, en Meira, celebrou unha xornada especial coa inauguración da aula dedicada á economista galega María Loureiro García, catedrática no Departamento de Fundamentos da Análise Económica da Universidade de Santiago de Compostela (USC), directora científica de ECOBAS e antiga alumna do centro.
Natural da Pontenova, María Loureiro regresou ás aulas nas que estudou para compartir unha mañá de aprendizaxe e inspiración co alumnado. A xornada comezou cun coloquio no que a profesora abordou cuestións relacionadas coa economía local, respondendo ás preguntas dos estudantes e ofrecendo unha visión próxima, rigorosa e motivadora sobre o papel da economía na sociedade actual.
Posteriormente tivo lugar o descubrimento da placa conmemorativa situada na aula de 1º de Bacharelato de Ciencias Sociais e Humanidades, espazo no que se imparte a materia de Economía e que, desde agora, leva o nome da economista.
Desde o centro educativo destacaron que este bautizo forma parte do proxecto de recoñecemento a mulleres significativas da contorna, co obxectivo de visibilizar referentes próximos que destacan polo seu compromiso coa investigación, a docencia e o avance da sociedade.
O acto contou coa participación de alumnado, profesorado e representantes da comunidade educativa, que agradeceron a María Loureiro a súa presenza e o seu exemplo para as novas xeracións.