O MITECO adxudica 1,3 millóns de euros a tres proxectos empresariais nas Pontes
O Ministerio para a Transición Ecolóxica e o Reto Demográfico (MITECO) resolveu a concesión de 22,3 millóns de euros en axudas a 35 proxectos empresariais que se desenvolverán en zonas de transición xusta. No caso galego, a resolución contempla tres iniciativas empresariais no municipio coruñés das Pontes, que recibirán en conxunto 1,3 millóns de euros en subvencións.
A través do Instituto para a Transición Xusta (ITJ), o departamento busca favorecer a creación de emprego e impulsar novas actividades económicas nos municipios afectados polo peche de minas de carbón, centrais térmicas e instalacións nucleares.
O conxunto dos proxectos seleccionados permitirá mobilizar preto de 93 millóns de euros en investimentos e leva aparellado o compromiso de crear 435 postos de traballo, que deberán manterse durante un mínimo de tres anos por parte das empresas beneficiarias.
A convocatoria conta tamén cunha achega de 13,7 millóns de euros procedentes do Fondo de Transición Xusta da Unión Europea. As propostas aprobadas abranguen diferentes sectores produtivos, entre eles a transformación de recursos forestais, a industria agroalimentaria, a reciclaxe e a economía circular.
Entre os proxectos destacados figura a posta en marcha nas Pontes dunha planta para transformar residuos e subprodutos destinados á fabricación de taboleiros de alto valor engadido. Esta iniciativa dispón dun investimento subvencionable de 1,6 millóns de euros e prevé a creación de 17 empregos.
Fóra de Galicia, a resolución recolle outras actuacións en distintos puntos do Estado. En Morcín (Asturias) instalarase un centro de transformación de biomasa forestal, cun investimento subvencionable de 6,7 millóns de euros e unha previsión de 30 postos de traballo.
No ámbito da reciclaxe, Albalate del Arzobispo (Teruel) contará cunha instalación dedicada ao tratamento de paneis fotovoltaicos, cun investimento de 2,4 millóns de euros e a creación comprometida de 18 empregos. Pola súa banda, Carboneras (Almería) acollerá un centro de produción de zumes ecolóxicos, que prevé un investimento subvencionable de 3,7 millóns de euros e 26 novos postos de traballo.
A relación de iniciativas complétase cunha planta de elaboración de embutidos e produtos cárnicos en Barruelo de Santullán (Palencia), que contará cunha axuda de 600.000 euros e permitirá crear tres empregos.
Ademais desta convocatoria, o Instituto para a Transición Xusta está a preparar a resolución doutra liña de subvencións dirixida a pequenos proxectos de investimento nestes territorios, ao abeiro do regulamento europeo de minimis. A previsión é que a resolución definitiva se publique nas vindeiras semanas e conte cunha dotación adicional próxima aos catro millóns de euros para apoiar novas iniciativas empresariais nas zonas de transición xusta.