O Museo Etnográfico Monte Caxado presenta un novo caderno especial polo seu 40 aniversario
A Fundación Museo Etnográfico Monte Caxado dará a coñecer publicamente o vindeiro venres 10 de xullo, ás 19.30 horas na Praza da Igrexa das Pontes, un novo número dos Cadernos do Museo.
Esta edición resulta especialmente significativa por coincidir coa celebración das catro décadas desde a creación da entidade, un fito que serve para render homenaxe a todas as persoas que fixeron posible a súa traxectoria histórica.
O acto mantén a tradición consolidada nos últimos oito anos de situarse no venres previo ás populares Festas do Carme e da Fraga, co obxectivo de integrarse de cheo na programación cultural do verán pontés e evitar, ao mesmo tempo, posibles coincidencias horarias con outras actividades locais.
A nova publicación, que contou para a súa financiación cunha achega económica da área de Cultura da Deputación da Coruña, propón un detallado percorrido cronolóxico pola historia do museo desde os seus inicios ata a actualidade. A través destas páxinas, a entidade repasa corenta anos de esforzo colectivo centrados na recuperación da memoria, a conservación do patrimonio e un firme compromiso coa cultura popular tanto das Pontes como de toda a súa comarca.