O patio exterior do CEIP O Salvador será renovado para mellorar a seguridade do alumnado
O Concello da Pastoriza levará a cabo obras de mellora no patio exterior do CEIP O Salvador para renovar o pavimento deteriorado existente nas instalacións. A actuación ten como principal obxectivo incrementar a seguridade do alumnado e evitar os riscos derivados do desgaste que presenta actualmente esta superficie.
Os traballos permitirán acondicionar unha zona moi utilizada polos nenos e nenas durante os recreos e as actividades ao aire libre, mellorando as condicións de uso e contribuíndo a ofrecer un espazo máis cómodo e seguro para a comunidade educativa.
Desde o Concello destacan que esta intervención responde á necesidade de manter en bo estado as infraestruturas educativas do municipio e garantir que os escolares poidan desenvolver a súa actividade diaria nun entorno adecuado.