O PM Friol presenta esta fin de semana os seus equipos femininos no XIV Trofeo Concello de Friol
O fútbol feminino volverá ser protagonista esta fin de semana no Municipal de A Reigosa con motivo dunha nova edición do Trofeo Concello de Friol, que servirá tamén para presentar oficialmente os equipos femininos do PM Friol.
A xornada de hoxe, sábado 29 de agosto, estará dedicada á disputa dun triangular feminino no que participarán o PM Friol A, o SD O Val de Narón e o Victoria FC. Os encontros comezarán ás 17.00 horas co partido entre o SD O Val e o PM Friol A. Ás 18.00 horas será a quenda do Victoria FC fronte ao SD O Val, mentres que ás 19.00 horas pechará o triangular o enfrontamento entre o PM Friol A e o Victoria FC.
Xa o domingo 30 de agosto, a partir das 17.30 horas, o PM Friol B recibirá no Municipal de A Reigosa a visita do equipo asturiano La Caridad CF.
Desde o PM Friol destacaron que este trofeo servirá como preparación para unha nova tempada, que afrontan con ilusión, e agradeceron un ano máis a colaboración do Concello de Friol e, especialmente, do alcalde, José Ángel Santos Sánchez, polo apoio que fai posible a celebración do torneo.
A entidade deportiva convida á veciñanza a achegarse ao Municipal de A Reigosa para acompañar os equipos femininos durante esta fin de semana de fútbol.