O Poboado das Veigas celebrará tres días de festas con deporte, música e actividades populares
O barrio do Poboado das Veigas, nas Pontes, acollerá esta fin de semana as súas festas cun amplo programa de actividades pensado para todos os públicos. A comisión organizadora preparou unha fin de semana chea de deporte, música, tradición e animación popular coa colaboración de diferentes entidades e empresas da comarca.
As celebracións comezarán o venres coa disputa do maratón de fútbol sala feminino e masculino. A xornada completarase coa actuación de Rockservatorio do Conservatorio das Pontes e cunha verbena amenizada pola orquestra Origen.
O sábado 30 será unha das xornadas máis intensas do programa festivo. Haberá pasarrúas cos Feroes da Galgueira, xogos rurais e competicións de baloncesto feminino e masculino. Ademais, celebrarase unha misa solemne coa participación da Coral de Endesa. A sesión vermú contará coa música do trío Antha e tamén haberá unha gymkana de motos e fogos artificiais. Pola noite, a verbena estará protagonizada polo propio trío Antha e a orquestra Atenas.
As festas rematarán o domingo 31 de maio cunha xornada dedicada ao atletismo e á música. Actuará a Banda de Música Cultural e Recreativa das Pontes e celebrarase unha sesión vermú longa coa orquestra Metrópolis. Ademais, disputaranse as finais do maratón de fútbol sala.
A organización agarda unha importante participación veciñal nunhas festas que buscan consolidarse como unha das citas destacadas do calendario festivo das Pontes, combinando tradición popular, deporte e espectáculos musicais durante toda a fin de semana.