O Polo de Friol organiza un encontro de mulleres emprendedoras polo Día da Muller Emprendedora

LugoXa | TerraChaXa
O encontro, baixo o título 'Emprender en feminino: compartindo experiencias no Día da Muller Emprendedora', desenvolverase o xoves entre as 10:30 e as 13:00 horas
muller-ordenador-dixital-oficina-emprego
17 Nov 2026

O Polo de Emprendemento e Apoio ao Emprego de Friol organiza este xoves, 19 de novembro, unha actividade con motivo do Día da Muller Emprendedora, unha iniciativa coa que se busca poñer en valor o talento, a iniciativa e o papel das mulleres no desenvolvemento económico e social do medio rural.

O encontro, baixo o título Emprender en feminino: compartindo experiencias no Día da Muller Emprendedora, desenvolverase entre as 10:30 e as 13:00 horas en Cunina Lugo, situada na avenida Vila Verde Cidade de Portugal, número 25, baixo, en Lugo.

A actividade contará cunha mesa redonda na que participarán tres mulleres emprendedoras de diferentes sectores, que compartirán as súas experiencias e traxectorias profesionais. Ademais, haberá un espazo de diálogo aberto para favorecer o intercambio de ideas, experiencias e propostas entre as persoas asistentes.

A xornada rematará cun café networking, pensado para facilitar o contacto, a colaboración e a creación de novas oportunidades entre as participantes.

Desde o Polo de Emprendemento de Friol animan a participar nesta iniciativa, que pretende crear un espazo de encontro e colaboración arredor do emprendemento feminino e da súa importancia para o desenvolvemento do rural.

0.12640905380249