O pontés David de la Encina foi nomeado novo delegado do Goberno en Ceuta
David de la Encina, natural de As Pontes, foi nomeado este martes novo delegado do Goberno en Ceuta, substituíndo no cargo a Miguel Ángel Pérez Triano. A súa chegada prodúcese nun momento especialmente relevante para a cidade autónoma, dous meses despois da entrada masiva rexistrada en Ceuta.
Aínda que boa parte da súa carreira profesional e política se desenvolveu no sur de España, De la Encina mantén unha estreita relación con As Pontes, onde viviu durante toda a súa infancia e mocidade, ata os 18 anos. Na localidade pontesa conserva tamén vínculos familiares e afectivos.
O nomeamento foi recibido con satisfacción nas Pontes. O alcalde do municipio e presidente da Deputación da Coruña, Valentín González Formoso, felicitou publicamente o novo delegado do Goberno a través das redes sociais e destacou a súa vinculación coa localidade.
Coa súa incorporación á Delegación do Goberno en Ceuta, David de la Encina retoma a súa actividade na primeira liña da xestión pública despois dunha etapa centrada na súa actividade profesional.
O político socialista desenvolveu durante anos a súa carreira na provincia de Cádiz. Entre 2015 e 2019 foi alcalde de El Puerto de Santa María, ademais de exercer como secretario xeral do PSOE local e concelleiro.
Posteriormente, en setembro de 2019, asumiu a presidencia da Mancomunidade de Municipios da Baía de Cádiz e converteuse tamén en deputado provincial na Deputación de Cádiz.
De la Encina deixou estas responsabilidades institucionais o 30 de xuño de 2023 e reincorporouse á súa actividade profesional como coordinador de Andalucía Emprende na provincia de Cádiz. Agora abandona este posto para asumir a Delegación do Goberno na cidade autónoma de Ceuta.