Eleccións | Economía

Os candidatos populares por Lugo defenderon nun encontro con cargos da Terra Chá un plan de choque fiscal que inclúe baixar o IVE da enerxía e deflactar o IRPF para mellorar a capacidade económica dos fogares

Imaxe de arquivo

Os números un ao Congreso e ao Senado do PP por Lugo, Francisco Conde e José Manuel Barreiro, defenderon este sábado en Vilalba a necesidade dun cambio de rumbo no Goberno central para reducir a presión fiscal sobre as familias e conter o encarecemento dos produtos de primeira necesidade.

Durante un encontro celebrado na localidade con alcaldes, concelleiros e afiliados do partido na comarca da Terra Chá, ao que asistiu tamén a presidenta local do PP, Sandra Vázquez, os candidatos expuxeron a proposta impulsada por Alberto Núñez Feijóo para moderar o incremento dos prezos e reducir os impostos que afectan directamente aos ingresos familiares, tanto no IRPF coma no IVE. Entre as medidas propostas figura a aplicación dun tipo do 0 % no IVE dos alimentos básicos.

Os representantes populares puxeron sobre a mesa varios datos para xustificar a súa proposta: segundo a súa exposición, o custe da vida tería aumentado un 28,5 % dende que o actual Goberno está no poder, con subas que no caso dos alimentos chegarían case ao 42 %, arredor dun 30 % na electricidade e ata un 50 % no gasóleo. A este encarecemento sumaríase, segundo os candidatos, un aumento sostido da carga tributaria, con máis dun cento de subidas de impostos e cotizacións durante esta lexislatura.

Conde explicou que, coa situación actual, un traballador precisaría dedicar 231 días ao ano a xerar ingresos destinados ao pagamento de impostos, 53 xornadas máis que en 2018. “O Goberno está a facer caixa mentres as familias fan equilibrios para chegar a fin de mes”, afirmou o candidato, quen insistiu en que a proposta do PP non pasa por recortar servizos públicos, senón por deixar máis recursos dispoñibles nos fogares e mellorar a xestión. Neste sentido, lembrou que Galicia xa aplicou baixo gobernos do PP rebaixas na carga fiscal.

O plan económico presentado polos populares para recuperar poder adquisitivo inclúe, ademais do IVE ao 0 % nos alimentos esenciais —como a carne, o peixe ou as conservas—, unha redución dos impostos que gravan a enerxía, tanto na electricidade coma nos carburantes. Tamén contempla a deflactación do IRPF, axustando os tres primeiros tramos e o conxunto de mínimos e deducións, con especial atención ás vinculadas á maternidade, ás familias numerosas e ás persoas con discapacidade a cargo. A isto súmase a proposta dun réxime de IVE simplificado para autónomos que facturen menos de 85.000 euros anuais.

Pola súa banda, Barreiro criticou o que cualificou de discurso “triunfalista” por parte do Executivo central en materia económica, ao considerar que non se corresponde coa experiencia diaria da cidadanía á hora de facer a compra. O candidato ao Senado sinalou ademais que, a pesar dunha recadación fiscal que cualificou de histórica, isto non se tería traducido nunha mellora dos servizos públicos. Como exemplo do que considera unha desatención cara á provincia, citou o estado de conservación dalgunhas estradas nacionais e a falta de mantemento en infraestruturas estatais, entre elas a Casa Sindical de Vilalba.

Durante o acto, Sandra Vázquez puxo en valor o respaldo electoral que recibe o PP en Vilalba, onde subliñou que a formación foi a lista máis votada nos últimos comicios municipais. A presidenta local destacou o papel do Concello dentro do proxecto liderado por Feijóo, que incorpora á candidatura ao Senado o concelleiro vilalbés Daniel Orosa.

Orosa, pola súa parte, defendeu tamén a necesidade dun cambio no Goberno de España e comprometeuse a representar os intereses da provincia de Lugo e, en particular, a trasladar as demandas específicas de Vilalba.