Política

Os populares felicitan a adxudicación de novas parcelas no polígono industrial, pero consideran que a medida é unha excepción dentro dunha etapa marcada pola falta de iniciativa

O Partido Popular de Vilalba felicitou á nova empresa adxudicataria das parcelas do polígono industrial ao considerar que a chegada de novos proxectos empresariais representa unha noticia positiva e un impulso económico para o municipio. Con todo, a formación aproveitou para reclamar ao executivo local un maior esforzo en materia de desenvolvemento empresarial e lamentou que esta actuación constitúa unha excepción dentro da xestión actual.

Os populares sinalan directamente ao responsable municipal Modesto Renda, ao que atribúen a responsabilidade de dificultar o labor de empresarios e emprendedores interesados en investir e desenvolver proxectos en Vilalba. Neste sentido, cuestionan as declaracións realizadas tras a adxudicación de dúas parcelas industriais. “Como pode dicir que foi un dos días máis felices da súa vida tras levar tres anos no goberno sen facer nada?”, preguntan.

Desde o PP consideran que o Concello atravesa unha etapa de esgotamento na súa xestión e aseguran que o executivo local está destacando pola súa falta de actuacións en lugar de centrar os seus esforzos na captación de empresas e investimentos para o municipio.

A formación lembra ademais que o desenvolvemento do parque empresarial leva anos acumulando atrasos e situacións de parálise, unha circunstancia que, segundo sosteñen, provocou que diversos proxectos quedasen freados pola ausencia de iniciativa política.

Os populares advirten de que Vilalba non pode permitirse manter parcelas industriais sen adxudicar nin continuar atrasando a ampliación do polígono empresarial por falta de xestión. Neste contexto, aseguran que os empresarios e emprendedores que pretenden investir, ampliar a súa actividade e crear emprego no municipio non deberían atopar no Concello obstáculos burocráticos nin desinterese institucional.

Así mesmo, reclaman un cambio de rumbo na política industrial municipal e consideran necesario ofrecer solo industrial competitivo e condicións atractivas que permitan evitar que as empresas opten por trasladar os seus investimentos a outros municipios. “Hai que dar un xiro de 180º á política industrial do Concello”, conclúen.