O PSOE de Abadín denuncia a falta do cartel da Deputación nas obras do pavillón de Baroncelle
O voceiro do PSdeG en Abadín, Pablo Díaz, reclama ao goberno municipal que instale o cartel que identifica o financiamento da Deputación de Lugo nas obras de acondicionamento e peche do pavillón de Baroncelle, que recibiron unha achega provincial de 19.326,08 euros. Os socialistas denuncian que a infraestrutura continúa sen esta sinalización obrigatoria malia as reiteradas peticións realizadas ao executivo local.
Segundo explica Díaz, o Concello anunciou a mediados de setembro a finalización dos traballos neste inmoble, utilizado como local social, sen colocar o cartel correspondente. O Grupo Municipal Socialista levou o asunto ao pleno e denunciouno publicamente, pero asegura que non obtivo resposta do PP nin conseguiu que se corrixise a situación.
"Ás portas das festas que se celebran esta fin de semana na parroquia, o cartel segue sen instalar. A veciñanza de Abadín merece coñecer de onde proceden os investimentos", afirma o portavoz socialista.
Díaz acusa o goberno de Rancaño de ocultar a procedencia dos fondos provinciais e lembra que dar publicidade ao financiamento das actuacións é unha condición das axudas e unha obriga de transparencia coa cidadanía.
O socialista tamén contrapón esta situación á difusión que fixo o Concello da adquisición dunha nova retroescavadora por 123.420 euros. Segundo denuncia, o anuncio municipal destaca que a compra conta co financiamento da Xunta de Galicia, mentres que a achega da Deputación para as obras de Baroncelle continúa sen estar identificada no lugar.
Para Díaz, esta diferenza evidencia un uso partidista da información institucional, ao seu xuízo favorable ás administracións gobernadas polo PP e menos visible no caso dos fondos provinciais.
Os socialistas alertan dunha posible perda das axudas
O voceiro do PSdeG advirte de que a falta de publicidade pode ter consecuencias económicas para o Concello. Segundo lembra, as bases do Plan Deputación establecen que "o incumprimento do deber de publicitar as axudas concedidas implicará a perda do dereito".
A formación cualifica de "vergoña" que, ao seu parecer, o goberno municipal poña en risco recursos destinados a mellorar as infraestruturas e os servizos por non cumprir as condicións das achegas recibidas.
Por este motivo, os socialistas esixen a Rancaño que instale de inmediato o cartel do pavillón de Baroncelle, garanta a identificación das actuacións financiadas pola Deputación e responda ás reclamacións da oposición.
"Imos seguir vixiantes. Non imos tolerar que se incumpran as normas nin que se lles falte ao respecto aos veciños e veciñas da nosa comarca. Un goberno municipal serio ten que actuar con responsabilidade para non comprometer os recursos que necesita o concello", conclúe Díaz.