O sábado darán comezo as Invernadas de Cine de Cabreiros
![invernada cine portada cabreiros](https://terrachaxa.com/wp-content/uploads/2021/10/invernada-cine-portada-cabreiros.jpg)
A IX Invernada de Cine de Cabreiros arrincará o día 23 de outubro e dilatarase ata o 18 de decembro para así dinamizar un ano máis o audiovisual e o rural galego.
Serán, como vén sendo habitual na Casa Escola de Cabreiros, e a edición comezará o día 23 de outubro ás 18.30 horas, co documental A poeta analfabeta. Este documental quere dar a coñcer a figura de Luz Fandiño, poeta compostelá, nacionalista e feminista, que se viu obrigada a emigrar na época franquista.
O 6 de novembro ás 18.30 será a vez de Bravas, de Isabel Risco. É unha produción teatral sobre mulleres sen medo, mulleres que forman parte dun valeroso clan. Esta actuación está dentro da programación de verán da Deputación.
O 13 de novembro ás 18.30 será a quenda de desfrutar do filme Negro Púrpura da produtora Illa Bufarda, sobre LSD, multinacionais farmaceúticas, pragas medievais, medicina popular e CIA, conectados por un fungo alucinóxeno coñecido como o ouro negro na Galicia do século XX.
O 20 de novembro celebrarase a presentación do libro Otra educación con cine, literatura y canciones, de Jaume Carbonell Sebarroja e Jaume Martínez Bonafé, este último doutor en Fiolosofía e Ciencias da Educación na Universidade de Valencia. Trátase dun ensaio divulgativo da infancia e da xuventude dentro e fóra da escola, da diversidade cultural e sexual, do pensamento crítico e do profesorado invitado á reflexión.
A presentación apoiarase na proxección da película Buda explotó por vergüenza, dirixida por Han Makhmalbaf, que relata a historia dunha nena afgana que loita por ir á escola e recibir unha formación.
O 4 de decembro ás 18.30 haberá un monólogo a cargo de Oswaldo Digón, un dos cómicos galegos de maior prestixio nesta especialidade.
O 18 de decembro rematará o programa ás 18.30 terá lugar un espectáculo de maxia con Álex Louzao.
Dende a organización lembran que haberá aforo limitado para poder garantir as medidas de seguridade e sanitarias derivadas da pandemia da covid-19, e que para acudir será necesario reservar praza ata unha semana antes de cada unha das proxeccións chamando aos teléfonos 686 104 780 ou 606 282 251.
![invernada de cine cabreiros](https://terrachaxa.com/wp-content/uploads/thumbs/2021/10/invernada-de-cine-cabreiros-200x382.jpg)