O SLG convoca o mércores en Gontán unha charla informativa sobre os proxectos de plantas de biogás
O Sindicato Labrego Galego (SLG), en colaboración coa Plataforma StopBiogás Abadín, organizará este miércoles, 22 de xullo, unha charla informativa en Gontán co obxectivo de achegar á veciñanza información actualizada sobre os proxectos de plantas de biogás previstos no municipio de Abadín.
O encontro celebrarase ás 21.30 horas no Local do Darío, situado ao carón da nave do Cuba, e está aberto á participación da cidadanía interesada en coñecer máis detalles sobre estas iniciativas.
Na xornada intervirán Andrés Castro, técnico do Sindicato Labrego Galego; Brais Álvarez, apicultor e secretario de Acción Sindical do SLG; e Henar Román, veciña de Abadín e portavoz da Plataforma StopBiogás Abadín.
Segundo explican os organizadores, a finalidade da reunión é ofrecer información actualizada sobre o estado dos proxectos e resolver as dúbidas que poidan xurdir entre a veciñanza. O Sindicato Labrego Galego reiterou a súa posición contraria a este tipo de instalacións no municipio, ao considerar que Abadín, cun modelo baseado na gandaría extensiva e nas explotacións familiares, non precisa destas plantas.
A convocatoria enmárcase nas accións informativas que diferentes colectivos están a promover nas últimas semanas arredor dos proxectos de biogás previstos na comarca.