Cultura

Trátase dun espectáculo de narración oral, monicreques e música creada polo dramaturgo, director e actor Inacio Vilariño

A compañía de teatro de monicreques creada polo dramaturgo, director e actor Inacio Vilariño estará este sábado, día 24 de outubro, a partir das 17 horas, na Casa-Museo Manuel María para presentar O tranvía Leonardo. Este é un espectáculo de narración con monicreques e música dirixido para público infantil (de catro anos en diante) e familiar en que se conta a historia do primeiro tranvía a vapor de Galiza, que como era lento, suxo, pequeno, estreito e descarrilaba, a miúdo foi motivo de mofa e protagonista de innúmeras cancións e anécdotas.

A música é o fío condutor deste espectáculo en que se cantan acompañados de caixa de música e reque reque as cancións: Caramba!; O trole do tranvía; Chucurruchú; O miudiño; Tango do billete; Romance de Guillermo; A Maturragaina; e O trabalinguas das trisílabas.

Pepe Tafall, xefe do tranvía de María a Pontevedra, e ademais cómico amador e dramaturgo, conta a historia do tranvía Leonardo desde o seu nacemento en Bruxelas até a súa vellez, coa intención de que o propietario, o marqués de Riestra, o xubile e lle dea o seu merecido retiro. Alén das historias do travía Leonardo, Tafall, conta algunhas das anécdotas máis simpáticas dos seus tripulantes: Moncho o maquinista e Ramón o do fogón; e dalgúns dos seus pasaxeiros máis famosos: Xosé Echegaray, o médico Guillermo, a cega Morcega, a mestra Trini Trapa e o loro Ravachol.

As persoas en asistir ao espectáculo teñen que reservar (billete 2 euros) en contacto@casamuseomanuelmaria.gal ou no whatsapp 698177621.