O Vilar, na Esfarrapa das Pontes, celebra este sábado a Festa de San Cristovo
A lugar do Vilar, na Esfarrapa, en As Pontes, celebrará este sábado, 5 de setembro, a tradicional Festa de San Cristovo cunha programación pensada para reunir veciñanza e visitantes arredor da música, a gastronomía e diferentes propostas culturais e de lecer.
A xornada festiva dará comezo ás 13.00 horas coa misa acompañada de procesión. A continuación, ás 13.45 horas, terá lugar o pregón das festas, que correrá a cargo de Abel López Soto.
Un dos principais momentos da celebración será a comida popular, servida pola comisión de festas e con menú a cargo de O Paso, que incluirá polbo con cachelos, churrasco mixto, pan, viño, auga e refrescos, ademais de sobremesa, café e licores. O prezo establecido é de 36 euros para os adultos e de 15 euros para os nenos e nenas de entre 7 e 14 anos, mentres que os menores de sete anos poderán participar de maneira gratuíta. Ademais, durante a noite haberá pinchos para continuar coa celebración.
A programación contará tamén con diferentes actividades para os máis pequenos, entre elas xogos infantís a cargo de Picariños e un sorteo de agasallos. A parte cultural completarase coa exposición de pintura O Meidelo, de ARTPO, e cunha exposición de puntadas organizada por Agarimo.
Pola tarde, a festa continuará cunha sesión vermú e verbena amenizada polo Dúo Caramelo, acompañada dunha sobremesa musical a cargo do alumnado da Escola de Acordeón.
A celebración está organizada pola Comisión de Festas, coa colaboración do Concello das Pontes, e pretende manter viva unha cita tradicional da parroquia do Vilar na Esfarrapa, combinando os actos relixiosos coa gastronomía, a música e as actividades para todos os públicos.