O XII Roteiro Avelino Díaz percorrerá o camiño entre a casa natal do poeta e A Pena
A Asociación Cultural Avelino Díaz organiza o vindeiro domingo, 30 de agosto, a duodécima edición do Roteiro Avelino Díaz, unha iniciativa que cada ano percorre espazos vinculados á vida e á memoria do poeta. O itinerario comezará ás 10.30 horas na súa casa natal, situada na Travesa, na parroquia da Órrea, e rematará na casa de Avelino Díaz na Pena.
Un dos momentos destacados da xornada será ás 12.30 horas, coa inauguración dun novo chanto realizado por Manolo Pardo. O acto contará como padriño co escritor e dinamizador cultural Mario Outeiro. A chegada á casa de Avelino na Pena está prevista para as 13.00 horas.
Á mesma hora terá lugar un pasarrúas a cargo do grupo tradicional Noxo Me Dás, de Vilalba, unha actuación incluída no programa Tradigalu da Área de Cultura da Vicepresidencia da Deputación Provincial de Lugo. A organización sinala que se garantirá a viaxe de volta á Órrea para aquelas persoas participantes que o precisen.
A xornada concluirá ás 14.30 horas cunha comida gratuíta para todas as persoas participantes na Casa da Cultura de Meira. Para participar é necesario inscribirse previamente, indicando o nome completo, a través dos teléfonos de WhatsApp 636 721 008 ou 647 904 828, preferentemente antes do mércores 26 de agosto ás 22.00 horas.
O Roteiro Avelino Díaz consolídase así como unha cita anual para lembrar a figura e a obra do poeta, ao tempo que promove o coñecemento dos lugares ligados á súa vida e facilita un espazo de encontro para a veciñanza e as persoas interesadas na cultura e na tradición da comarca.