Olimpia López defende en Vilalba ante a mocidade o pensamento crítico, a empatía e a liberdade
A subdelegada do Goberno en Lugo, Olimpia López, asistiu hoxe á representación da obra teatral Melón Pelado no IES Santiago Basanta Silva de Vilalba. Alí, destacou a importancia de achegar á xente nova a cultura e os valores democráticos e animou á mocidade a “pensar de xeito crítico, actuar con empatía e actuar con liberdade. A memoria histórica tamén é un mapa para construír o noso futuro”.
A representación completouse cun coloquio posterior para favorecer a reflexión do alumnado de primeiro curso de Bacharelato sobre estes episodios da historia recente.
Esta iniciativa consiste nun ciclo de representacións teatrais en catro localidades de Galicia, co impulso da Delegación do Goberno en Galicia e o Comisionado para a Celebración dos 50 anos de España en liberdade.
Melón pelado propón unha viaxe iniciática cara a lugares da historia non escrita nin contada, nin moito menos fotografada, para reflexionar sobre o propio feito da memoria do atopado.
Na obra, dúas titiriteiras abren unha caixa de bonecas que en realidade é un baúl dos recordos. Arrinca o conto. España, mil novecentos trinta e tantos. Ameniza o espectáculo a Banda de Música do Pobo (de calquera pobo). Entre o posto de churros e a caseta do anís comparece a procesión, o desfile, a comparsa. Pero trátase dun desfile dantesco de bonecas rapadas. A obra, sen dúbida, parece un esperpento. Pero de Valle-Inclán non é.
A proposta naceu en 2024, por iniciativa do Museo Raíña Sofía e, desde entón, represéntase a todo o territorio nacional. A peza combina narración oral, teatro de obxectos e documental e aborda a historia silenciada de miles de mulleres, que foron rapadas durante a Guerra Civil e a Posguerra.
É unha obra orixinal e propia da compañía ButacaZero, a plataforma creativa de Esther F. Carrodeguas e Xavier Castiñeira, que propón un teatro que dialoga coa actualidade desde unha mirada crítica e irónica.