Organizan este sábado unha visita guiada ao Castro de Viladonga

Os asistentes poderán coñecer de primeira man os achados e avances nas escavacións recentes deste importante xacemento arqueolóxico

Este sábado 19 de outubro, ás 11:30 horas, haberá unha visita comentada aos últimos traballos arqueolóxicos no Castro de Viladonga, no concello de Castro de Rei.

A actividade, organizada pola Xunta de Galicia e o Museo do Castro de Viladonga, non require inscrición previa.

Os asistentes poderán coñecer de primeira man os achados e avances nas escavacións recentes deste importante xacemento arqueolóxico. O punto de encontro será diante do propio Museo do Castro de Viladonga.

Esta actividade enmárcase dentro do programa CulturON, unha iniciativa para achegar o patrimonio cultural e histórico galego ao público.