Organizan un curso sobre administración electrónica de explotacións agrarias en Muras
![plantacion millo campo explotacion agraria](https://terrachaxa.com/wp-content/uploads/2021/10/plantacion-millo-campo-explotacion-agraria.jpg)
A Consellería do Medio Rural, a través da Axencia Galega da Calidade Alimentaria, organiza os días 2 e 3 de novembro dous cursos sobre a administración electrónica para a xestión das explotacións agrarias no concello lugués de Muras.
Ambos cursos, impartidos pola oficina agraria comarcal de Vilalba, celebraranse na Casa Consistorial en horario de tarde, de 15:00 a 21:00 horas. O obxectivo deste tipo de formación é que os titulares das explotacións e as persoas que se queiran incorporar á actividade agraria se familiaricen cos procedementos dixitais da Administración galega, principalmente os da Consellería do Medio Rural, incluídos os trámites da Oficina Agraria Virtual ou as aplicacións SGA e SGAFoto.
As accións están dirixidas en xeral a persoas vinculadas profesionalmente coa agricultura, a gandería, a industria agroalimentaria e o sector forestal ou con expectativas de incorporación, en especial mozos e mozas do rural galego.
A Axencia Galega da Calidade Alimentaria, a través da formación non regrada e dentro do Plan de formación continua 2021, pretende contribuír á consecución do aumento da competitividade do sector agrícola e forestal tanto a nivel técnico como económico mediante a oferta de cursos coma este.
Cómpre lembrar que a Consellería do Medio Rural conta cun plan de accións formativas e de transferencia para este ano 2021 que pode consultarse no seguinte enlace: https://ovmediorural.xunta.gal/gl/consultas-publicas/accions-formativas. Precisamente nesta páxina pódese atopar estes cursos e descargar as solicitudes de asistencia correspondentes, que deberán remitir ao enderezo electrónico maria.carmen.rego.martinez@xunta.es. Se os interesados precisan información adicional poden chamar ao teléfono 982 828 954.