Organizan un obradoiro de compostaxe doméstica en San Cosme de Piñeiro este xoves
A Escola de San Cosme de Piñeiro, en Pastoriza, acollerá o próximo 4 de xuño, ás 16.00 horas, un obradoiro de compostaxe doméstica dirixido a todas aquelas persoas interesadas en aprender técnicas sostibles para a xestión dos residuos orgánicos no fogar.
A actividade será impartida pola Asociación A Estruga, espazo agroecolóxico especializado en formación e divulgación ambiental. O obradoiro permitirá aos asistentes coñecer os principios básicos da compostaxe doméstica, así como os beneficios ambientais e económicos desta práctica, que contribúe á redución dos residuos e á obtención de compost de calidade para hortas e xardíns.
A iniciativa conta co financiamento da Vicepresidencia da Deputación de Lugo a través do programa Rural e está organizada pola Asociación de Veciños San Cosme de Piñeiro.
Con esta proposta búscase fomentar hábitos máis sostibles entre a veciñanza e promover o aproveitamento dos residuos orgánicos como recurso útil para a agricultura e a xardinería doméstica.