Outeiro de Rei proclama aos campións da Copa Terra Chá de fútbol sala
Outeiro de Rei converteuse esta fin de semana no epicentro do fútbol sala base coa celebración das finais da Copa Terra Chá 2026, unha cita que reuniu aos mellores equipos das diferentes categorías da competición e que puxo o broche de ouro á tempada.
Ao longo da xornada disputáronse os encontros decisivos, nos que os clubs participantes loitaron polos títulos ante a presenza de familiares, afeccionados e representantes institucionais. O equipo anfitrión foi un dos grandes protagonistas do torneo ao conseguir dous campionatos. Outeiro de Rei impúxose tanto na categoría prebenxamín como na benxamín, demostrando o bo momento que atravesa a súa canteira.
Na categoría alevín, o título foi para Cospeito, que completou unha destacada actuación e logrou facerse co trofeo tras superar aos seus rivais na fase final.
Pola súa banda, Guitiriz confirmou o seu potencial nas categorías superiores ao conquistar os campionatos infantil e cadete, converténdose nun dos clubs máis laureados desta edición da Copa Terra Chá.
A entrega de premios puxo o punto final á competición. Os trofeos foron entregados por Xosé Manuel García Rozas, delegado da Xunta na comarca da Terra Chá, e pola concelleira de Deportes de Outeiro de Rei, Pilar Méndez, que felicitaron aos equipos participantes polo seu esforzo, deportividade e compromiso ao longo do torneo.
A Copa Terra Chá volveu evidenciar a boa saúde do fútbol sala base na comarca e a importancia deste tipo de competicións para fomentar a práctica deportiva entre os máis novos.