Deportes

A elevada participación, con máis de 300 deportistas entre as distintas carreiras e a andaina, volveu poñer de manifesto o tirón desta proba

Máis de 300 deportistas participaron na oitava edición da Nocturna San Ramón de Vilalba, unha das citas deportivas xa consolidadas dentro do programa das festas patronais. A proba reuniu corredores de todas as idades, desde as categorías de pitufos ata veteranos, e contou tamén cunha andaina aberta á participación de afeccionados.

Na clasificación xeral, Pablo Bocelo e Zelinda Spencer proclamáronse vencedores da carreira, completando o podio Martí Miguéns e Amador Pena, así como María Jesús Conde e Ana Abuín. A competición contou cun percorrido de cinco quilómetros, con saída e chegada na Praza da Constitución.

Unha das novidades desta edición foi a categoría de equipos mixtos, na que a vitoria foi para No Está Mal. O segundo posto correspondeu a Atletismo Obradoiro, mentres que Zapato Veloz ocupou a terceira posición.

A VIII Nocturna San Ramón, organizada polo Club Atletismo Vilalba, converteu de novo as rúas da localidade nun escenario deportivo cunha elevada participación e un marcado carácter popular. A xornada permitiu combinar a competición coa participación de persoas de diferentes idades e niveis, nun ambiente de deporte e convivencia.

A entrega de premios contou coa presenza da alcaldesa de Vilalba, Marta Rouco, e da concelleira de Deportes, Paula Vigo, ademais de integrantes da organización e do futbolista vilalbés Diego Villares.

A elevada participación, con máis de 300 deportistas entre as distintas carreiras e a andaina, volveu poñer de manifesto o tirón desta proba, que alcanza xa a súa oitava edición e se mantén como unha das actividades deportivas destacadas das festas de San Ramón.