Pastoriza recoñece a tempada histórica do campión de España de tiro olímpico Manuel María Rivas Couso
O Concello de Pastoriza recibiu na Casa do Concello a Manuel María Rivas Couso, veciño do municipio que vén de completar unha tempada destacada no tiro olímpico, coa conquista de varios títulos nacionais.
O deportista acudiu ao encontro acompañado dos trofeos que acreditan os seus resultados ao longo da tempada. Rivas Couso proclamouse Campión de España de Armas Deportivas na modalidade de 9 mm, Campión da Copa de España de Pistola Standard na categoría Veterano Senior e Subcampión da Copa de España de Armas Deportivas, competicións organizadas pola Real Federación Española de Tiro Olímpico.
Durante a reunión, o tenente de alcalde, Marcos García, interesouse pola traxectoria deportiva de Rivas Couso e polas características dunha disciplina que esixe precisión, serenidade e unha preparación constante. En nome do Concello, trasladoulle a felicitación de toda a Corporación polo éxito acadado e destacou o orgullo que supón para Pastoriza contar cun deportista capaz de situar o nome do municipio nos primeiros postos do ámbito nacional.
O Concello puxo en valor tamén o feito de que o deporte de alto nivel se desenvolva desde o medio rural, grazas ao traballo e á constancia dos deportistas. Neste sentido, destacou a traxectoria de Manuel María Rivas Couso como exemplo de que desde a Terra Chá tamén é posible alcanzar os máis altos niveis da competición deportiva.
A Administración local reiterou o seu compromiso co apoio aos deportistas do municipio e felicitou Rivas Couso polos resultados acadados, ao tempo que lle trasladou os seus mellores desexos para as próximas competicións.