Penas de Rodas acollerá en maio a Copa de España de XCO
Xa se atopan abertas as inscricións para a proba da Copa de España de XCO, que se celebrará os días 16 e 17 de maio no circuíto de Penas de Rodas, Outeiro de Rei.
Esta edición será especialmente significativa, ao tratarse da primeira proba internacional de XCO organizada na provincia de Lugo, consolidando o crecemento do ciclismo de montaña na zona.
O circuíto contará cunha lonxitude aproximada de 4.500 metros por volta e un desnivel positivo acumulado de 160 metros, deseñado maioritariamente sobre terreo natural. O trazado incluirá elementos técnicos característicos do XCO, como zonas de raíces, seccións de pedra en vertical e algúns elementos artificiais, entre eles saltos, que achegarán dinamismo e esixencia técnica ao percorrido. Trátase dun circuíto técnico e fisicamente esixente, pensado para ofrecer un alto nivel competitivo e un grande espectáculo deportivo.
As instalacións do evento dispoñerán de dúas amplas zonas de paddock, destinadas a equipos e participantes, que contarán con servizos de duchas, baños e zona de bar, garantindo a loxística necesaria para o desenvolvemento da proba.
Prevese a participación dos principais corredores do panorama nacional, xunto coa presenza de corredores internacionais, o que elevará o nivel competitivo da proba.
A organización desexa expresar o seu agradecemento a patrocinadores e colaboradores, cuxo apoio fai posible a celebración desta competición.